VACAburra é o resultado da colisión de dúas creadoras cunha ampla traxectoria, Andrea Quintana e Gena Baamonde, que unen as súas inquedanzas nun proxecto común que xira ao redor da creación escénica e coreográfica en clave contemporánea. Crean Metodoloxías Carroñeras para Corpos Invertidos, conferencia performativa; O raro é que bailar sexa raro, solo de danza que reflexiona sobre a diversidade corporal;  Extravíos, peza de rúa cunha “ukestra” de ukeleles e Festina Lente, coprodución co Centro Coreográfico Galego. VACAburra quere achegar a todos os públicos a diversidade sexual atendendo aos posibles corpos e identidades. Busca fomentar una mirada interseccional e transfeminista da realidade social que nos atravesa e utilizar as artes escénicas como vía de sensibilización coa que impulsar a reflexión e o diálogo.