AGADIC Xunta de Galicia

APRAZADA A CELEBRACIÓN DA OITAVA EDICIÓN DE GALICIA ESCENA PRO

A Xunta de Galicia e a asociación Escena Galega acordaron aprazar a celebración da oitava edición do mercado galego das artes escénicas Galicia Escena PRO, así como deseñar conxuntamente un formato de feira flexible que facilite a súa adaptación á evolución da crise sanitaria polo Covid-19 nos próximos meses.

Galicia Escena PRO 2020 repetirá por segundo ano consecutivo o modelo de coorganización que a Consellería de Cultura e Turismo, a través da Axencia Galega das Industrias Culturais (Agadic), puxo en marcha en 2019 xunto con Escena Galega, principal asociación empresarial do sector en Galicia. Ambas entidades traballan na procura de datas alternativas que permitan a súa celebración coas garantías sanitarias que determinen as autoridades correspondentes, e incidindo no papel profesional deste evento como espazo de diálogo e intercambio entre os ámbitos da produción, a distribución e a programación de teatro e danza.